سمعت من الشيبان .. الراوي .. أسرة العلا

[أبو خالد]

سمعت من الشيبان .. الراوي .. أسرة العلا

السلام عليكم ورحمة الله وبركاته

هذا مقال جديد أطل فيه عليكم من نافذة أسرة القصص والروايات .. و هالمقال عباره عن سوالف و قصايد و حكم و أمثال سمعتها من الوالد أو من جدتي الله يرحمها ويغفرلها ويحسن اليها أو من بعض الشيبان و كبار السن اللي جلست معهم و سمعت منهم بعض الاخبار عن ماضينا و تراثنا الجميل

و في هالمقال راح أكتب عن الاشياء اللي سمعتها عشان تسمعوها معي و تستمتعو بالماضي زي ما أستمتعت فيه

و طبعا العهده علي الراوي و المعذره مقدما يمكن أكون نسيت شي أو أخطيت بمعلومه أو غيرت خبر أو مكان أو أسم لأسباب أمنية

و ياريت تكون الردود في نطاق المعقول و ما نشوف هجمات أو أسائات لأن هالعمل مهداء الي الماضي و الي التاريخ و الاجداد .. اللي ما يعجبه المقال يقدر مشكورا يضغط علي تراجع أو العوده للصفحه الرئيسة و كفى الله المؤمنين شر القتال

و بسم الله نبداء و هلا والله وغلا بالحضور و مشكورين علي زيارة المقال

و تقبلو تحياتي

أبو خالد

الراوي

[أبو خالد]

هذي سالفه سمعتها من شايب من الجماعه .. وهالسالفه ذي تكررت و صارت فأكثر من بيت و في أكثر من ديره .. لكن هالقصه هذي من أشهر القصص المماثله و اللي تدور حول نفس موضوعنا و هو شور النساء للنساء .. أكيد نساء المنتدى بيزعلو مني لكن هذا كلام الالولين مو كلامي أنا عن نفسي مع رائ النساء خاصتا أذا سكتو و أمتنعو عن التصويت

و يقال شور النساء للنساء يورد للمهالك .. وهالرواية وحده من سوالف شور النساء و المهالك اللي جرها هالرائ و هالمشوره الزينه .. و سالفتنا اليوم صارت قبل كم يوم .. يعني حوالي سنة الحطب و الغبار .. وقصتنا اليوم عن رجال كان يحب زوجته و متولع فيها لأبعد الحدود .. و قدر الله عليه وعليها و توفت زوجته و بقي الرجال عازب ( زي بعض الناس ) .. المهم صاحبنا نوى يتزوج مره ثانيه لانه ذاك الزمان ما يمديك تجلس عزوبي يبلشوك الناس و يغثوك أهلك .. المهم صاحبنا طاح له بوحده أرملة .. يعني سبق لها الزواج و توفئ زوجها .. زيه بالضبط .. المهم ما أطول عليكم تزوج الرجال و بعد فتره خافت زوجته و بدت الافكار تلعب براسها و حطت فبالها أنه ما يحبها و أنه للحين يحب زوجته الاولي و ماهو قادر ينساها .. و تفكيرها طلع بمحله .. قامت المسكينه و راحت لوحده من صاحباتها تشكيلها همها و تطلب رائيها و مشورتها .. و هذيك الملقوفه ما صدقت علي الله علطول شارت عليها و يا شورت القراده

قالت لها خويتها سوي نفسك مريضه و طيحي عليه و خلينا نشوف يحبك و الا لا .. قالت طيب المهم راحت البيت و طاحت بالفراش و قامت تون و تسوي أفلام مره تعصب راسها و مره تربط بطنها و مره تتمرخ بفكس و يصير يحة البيت كله فكس من غير العلاجات اللي مليمتها عند راسها عشان تقنع زوجها

الرجال جاء البيت و شاف المظر و عرف أنها كذابه .. و هاتك ركبه أبليس و عصب و طار عقله .. خاصتا لما طرت عليه زوجته الاولي و تخيله انه يشوفها قدامه و هي تتشمت فيه و تقله شوف اللي حطينها مكاني شوف حبيبت القلب .. عصب صاحبنا و تهور و ظلم المسكينه حبا فالاولي و زي ما يقولو حكم القوي حكم عليه بأسم الحب الاول يا عيني ( ويلي مصعب نسيانه ) .. صاحبنا كان شاعر و قال هالابيات :
إلي تون الصدق مرحومة الـروح
انتي تونيـن الغـلا والغلا سـدي بابه

فعلك على قلبي سـواة السكاكيـن
وإلـي بقـا بقلبـي لا .. تبحثينـه

من عقبها قلبي من الهـم مجـروح
ودمعي على خدي سـواة السحابـه

بيني وبين صويحبي عشرة سنيـن
ومعاكي ترى نفسي بهم .. وسجينـه

ما من كثر الحسوفـات مصلـوح
وصفي كما شايب تمنـى .. شبابه

احرص على ديني وفعل الردى شين
ياربي تلهمنـي الهـدى والسكينـة

يا بنت يا منك بوجهـي تمهزيـن
فعايلك يـا بنـت ماهـي .. بزينـه

قومي تراكي مطلقة ياريش العيـن
كفـي توالـي الهـرج لا تلحقينـه

و الابيات طويله ويمكن خرفت فيها شوي بس تقريبا هذا اللي سمعته .. و كما تلاحضو للأسف الشديد تنسيق الابيات الشعريه ماهو شغال .. و الملاحظه الاهم أن صاحبنا طلق زوجته بهالابيات و صارت مطلقة بسبب شور صاحبتها .. قامت المسكينة من قلت حيلتها و زعلها علي نفسها و علي خويتها و علي زوجها اللي طلقها و قالت هالابيات :
بطلب الطلاق مهوب بطلقه الا بثلاث
هذا جزات الحريم يوم يشورني

هات الثلاث وخل عنك التزفات
كلن على فرقـى خليلـه يونـي

إن كان تبكي على فايـتٍ فـات
فجروحِ قلبي من خليلي تونـي

يالله علوه في منازل رفيعـات
وسط الجنان مكيفن ومتهنـي

ما عاد أجمع لو اقرا له التحيات
دايم افكر فيه واقرا عن سنـي

القلب يفضح لو تماديت بسكات
ولو ما نطقت عيوني ألي حكني

كلن يبي يلقا نصيبه ولا فـات
لو كان فيك اليوم قد خاب ظني

مسكينة يا بطلت قصتنا و أتمنى أن هالقصه عجبتكم و لنا لقاء أخر أن شاء الله

تحياتي

[أبو خالد]

رقع يا مرقع

هذي سالفه قديمة يمكن تكون هي أولي السوالف اللي تتكلم عن المثل الشعبي الشائع والقديم رقع يا مرقع قال شيا يرقع وشيا ما يرقع .. و هالقصه صارت لأحد العلماء و المعلمين الاوائل اللي ذاع صيته بين العرب و صارو ينتظرو مروره عالقبايل بفارغ الصبر .. و هالعالم ذا كان أبوه جاهل و ما عنده ما عند جدتي .. و كان دايم يرافقهم بأسفارهم و محاضراتهم و أجتماعاتهم مع الناس .. و كان دايم يسوي فيها فاهم و يتفاخر بأنه عالم زي ولده و أنه مصيبه يعرف كل شي و هو ما عنده سالفه .. المهم ولده العالم الصحيح كان يبغاء يسافر لطلب العلم و بيغيب فتره .. والعرب طلبو من الشايب انه يجي يدرس عليهم و يعلمهم لين يرجع ولده .. تورط صاحبنا و بلش .. قله ولده بسيطه أنت روح و خذ معك كم واحد من طلابي يساعدوك و أي واحد يسألك قول هذي فيها قولان و خلي واحد من الطلاب يشرح القولان كنك بتفهمه يعني ( حركات ) .. و سافر العالم و ترك ابوه يلف علي الديار

و أدهر الشايب محاضرات و ندوات و لو فيه صحافه كان تلقاها فالصفحه الاولي .. و كان يتبع هالطريقه كل ما احد ساله يحول الجواب بطريقه حلوه للطلاب اللي معاه .. و مشت هالحيله فتره طويله لين جاب له الله اللي يكشف سره .. جاه واحد و قال هالعالم نصاب و ما عنده سالفه و بيضحك عليكم و انا بعون الله راح أكشفه لكم .. المهم سأل الشيخ و قله من هو الله .. و صاحبنا كالعاده قال هذي فيها قولان و حولها علي الطلاب .. و الطلاب تورطو و سكتو .. شوي فهم صاحبنا و انتبه للغلطه حقته وراح بيكحلها و قال للطالب رقع يا مرقع .. قاله شئ يرقع و شئ ما يرقع

أتمنى أن هالقصه عجبتكم و لنا لقاء أخر أن شاء الله

تحياتي

[باسم ابو سليمان]

يعطيك العافية اخوي ابو خالد
وبارك الله فيك

[أبو خالد]

الله يعافيك باسم

و مشكور عالزيارة

تحياتي

[*حبى الزاهر*]

رررررررررررررروعه ابا خالد
ولا تحرمنا من جديدك
دوومت بود

[أبو خالد]

أبشري بعزك حبي الزاهر

و مشكوره عالزيارة

تحياتي

[أبو خالد]

المجبر

هذي قصة أحد الاطباء المشهورين في مدينة العلا سابقا سمعتها من ولد خالت أبوي الله يرحمة و يغفرله و يسكنه الجنه .. قالي أنه يوم من الايام كان طالع من بيتهم و معاه حمار الله يعزكم و محمل عليه أغراض .. لحف و بطاطين و بساط و مرسله أبوه يوديها لبيت عمه اللي بآخر السكة .. و كان أبوه محذره و قايله لا تركب عالحمار أمسك الحبل و أمشي قدامه و هو يمشي وراك

المهم الرجال راح وصل الحموله ورجع .. و هو فالطريق طبت فيه اللقافه و القراده و قرر يركب علي الحمار .. المهم ربط الحبل و شمر ثوبه وركب عالحمار و جلس يتمختر تقول أنه راكب فرس .. و جلس يتمشي بالحمار لين دخل السوق و قرب لبيتهم .. الحمار يوم شاف باب البيت عرف أن فيه علف و ماء قام رمي صاحبنا وراح يركض .. و طاح الرجال و أنكسرت أيده

شال حاله وراح للبيت ويده توجعه .. والمشكله كان خايف يقول لأبوه عشان ما يعرف أنه عصاه و ركب عالحمار .. راح لمه يبكي من الالم و علمها بالسالفه .. قالت لازم نقول لأبوك طيحة الحمار يعني كسر الحمار لا رمى الادمي يكسره ماهو مثل الجمل والا الحصان .. و كانو يقولو أن طيحت الحمار تكسر أما طيحت البعير والخيل ما تأذي

صاحبنا خاف و عيا و قال لأمه لا تقولي لأبويه أذا دراء بيهاوشني .. قالت طيب و حطت له دهون و لفتها بهرقه و عصبتها له .. و فالليل زاد الوجع و زاد صراخه لين سمعه أبوه .. و يوم جاء والا أيده وارمه و حالته حاله .. قال أكيد ركبت عالحمار علمتك قلت لك لا تركب الحمار يالله قوم خليني أوديك للمجبر

ورحنا للمجبر .. والمجبر هو دكتور العظام .. أو أروتو دكتر .. ويوم شاف أيدي قال هذا مكسور لكن يعين الله .. و مسكو أيدي كل واحد يتل من جيهه لين تقلبت عيوني و صرت ما أشوف .. وشوي شوي لين ردوها زي ما كانت .. ولف علي أيدي عتره و بعدين حط لي الجبيره و هي عباره عن عيدان خشب صغيرات مربطه بخيوط .. لفها علي أيدي و بعدين لف عليها خيطين و فكل خيط فيه بكره .. بعدين جلس يلف البكره لين شد الخيط علي ايدي .. و لف البكره الثانية لين شدتت هي كمان .. و بعدين حط عود بين البكرتين و ثبتها فيه

و كنت كل يوم أمر عليه عشان يفك البكره و يشدها من جديد و يرجع يربطها .. لأنه كل يوم يخف الورم و ترتخي الجبيره .. و أتذكر كمان يوم جينا للمجبر طلب ثلاث ريال حق العلاج .. و بعدين علي دفعات .. ريال مقدم وريال لا فكيت الجبيره .. وريال لا شلت طاست الماء بيدي المكسوره

أيام .. و وصاني كمان علي الاكل و حددلي أنواع أكلها و أنواع ما أكلها .. و حذرني من الملوخية قال أصحك تراها تفك كسرك من جديد

و سمعته يتكلم مع أبويه و قال كلمه ما فهمت معناها غير بعد فتره .. قال فلان دمه حلو جرحه ما يبراء بسرعه .. و بعد سنين فهمت المقصود .. دمه حلو يعني مصاب بداء السكري .. يعني حتى العلاونه كانو يعرفو السكري ويسموه الدم الحلو .. و كان اللي يصيبه يتجنب الجروح قد ما يقدر لأنه جرح المصاب بالسكري ما يبراء بسرعه و هذي حقيقه علميه

رحمة الله عليكي يا عم

و أتمنى أن هالقصه عجبتكم و لنا لقاء أخر أن شاء الله

تحياتي

[العلاوي]

بوركت ابو خالد

مستمتعين بتلك الروايات اخي

واصل حديثك ....

[شاطي الذكريات]

يعطيك العافيه اخوي

[رعد الشمال]

قصص حلوه

بس لو تعطينياها

وحده وحده

احسن

علشان نتمخمخ فيها

[أبو خالد]

حياك الله العلاوي

و مشكور عالزيارة

تحياتي

[أبو خالد]

شاطئ الذكريات

شكرا عالزيارة

تحياتي

[أبو خالد]

أبشر يا أبو عبدالله

و مشكور عالزيارة

تحياتي

[أبو خالد]

" اللي يبينا عـيّـت النفـس تبغـيـه .. واللي نبي عيا البخت لا يـجيبه "

كنت دايم أسمع هالبيت .. أحيانا كمثل و أحيانا فالعروس .. و أنا نفسي قلت هالمثل أكثر من مره و فأكثر من موقف .. مره جدتي الله يرحمها كانت بتتمشرق فالحوش .. و جيت جلست عندها و جاسنا نسولف .. مدري وش جاب السالفه و طرينا هالبيت ذا .. و قالت لي قصيده حلوه .. و كنت وقتها فالابتدائي .. رحت أركض و جبت كشكول ( أسم الدلع حق الدفاتر ) و جلست أخربش و أكتب الابيات

ياعين هللي صافي الدمع هليه .. واليا انتها صافيه هاتي سريبه
ياعين شوفي زرع خللك وراعيه .. شوفي معاويده وشوفي قليبه

امـنـولٍ دايـم الـ رايــه انـمـالـيـه .. والـيـوم جـيتهـم عـلينا صـعـيبه
وان مرني بالدرب ماقـدر احاكيه .. امصـيبتٍ يا كبـرها من مصـيبـه

اللي يبينا عـيّـت النفـس تبغـيـه .. واللي نبي عيا البخت لا يـجيبه

و قالت أن هالابيات قالتها وحده يقال لها نوره الحوشان .. و نوره ذي شاعره و وحده من أشهر النساء زمان .. و كانت مشهوره بشعرها و حكمتها و حبها للخير .. كانت توزع صدقات و تعطف عالمساكين و تعطي المحتاجين و تفك الدين .. وكانت متزوجه واحد اسمه عبود بن علي العازمي .. و لها منه عيال أكبرهم حوشان بن عبود .. و كان لها قصه مشهوره مع زوجها لأنه صارت بينهم مشاكل و كبرت المشاكل لين وصلت للطلاق .. و كان طلاق بالثلاث ما فيه رجعه

كانت نوره من بيت حسب ونسب و معروفه و مشهوره عند العرب .. جوها الخطاب من كل مكان و جاها خيار الناس لكنها عيت و رفضت كل اللي تقدمولها .. و قررت أنها تجلس عازبه طول عمرها .. تربي عيالها و تداريهم و بس ما تبغاء تتزوج

و يوم من الايام كانت طالعه مع عيالها و تعدت من جنب البستان حق أبوهم .. و كان جالس يشتغل فالبستان .. شافوه العيال وراحو يركضو يسلمو علي ابوهم و يسولفو معه .. و هي وقفت براء البستان و جلست تراقبهم و قالت هالابيات اللي ذكرناها

و اللي يبينا عـيّـت النفـس تبغـيـه .. واللي نبي عيا البخت لا يـجيبه

و سلامتكم

و أن شاء الله قصتنا اليوم عجبتكم

و تحياتي

[العميد]

استمتعت بالقراءه وانتظر المزيد

يعطيك الف عافيه يابو خالد

[أبو خالد]

الله يعافيك يا العميد

أسعدنا حظورك و مشكور عالزيارة

تحياتي

[الصديق]

زرت الموضوع و تمتعت بقرائته

سلمت و سلمت يمينك
وقفه أخري للتاريخ و الحكمة ، يعطيك العافية
أخوك
عادل السبيعي
أبوفارس

[أبو خالد]

يالله تحي أبوفارس
منور المقال و أنا أخوك و هلا والله و غلا بمنتديات أسرة العلا
الله يعافيك يا أبوفارس .. و يسعد التاريخ فيك
تحياتي
الـــراوي

[عبدالقادر مكي]

اخي ابوخالد رائع في حضورك وغيابك تقبل تحياتي.

[احساسي ورد]

يعطيك العافيه



اخوي ابو خالد


تقبل مرووري